فاتت سنة
يااااه!!!!
بالسرعة دي فاتت سنة؟!!!!!
يا حبيبي يا ابني
يا ابن بطني
يا اللي اخترت الشهادة
لما داست فوق جبينك البيادة
يوميها جيت لي في المنام
وحلفت لي
والنعمة يا أمه
لما شفت الموت حاوطني
كان حاضني
وكان رحيم
أرحم كتير من البهدلة
ومن الشقا
ومن جوعنا في ميعاد العشا
والاهانة والتريقة!
وبكره يا امه هتلاقيني
في الميدان وسط اخواني
راجع من جديد أهتف بعلو الصوت
راجع من جديد
وتاني مستعد أموت
بلغي كل الشرفا
وكل احبابي
بكره ميعاد اللقا
وأهو فاتت سنة
جاي السنة دي يا ضنايا
والا انتظر كمان سنة؟!!!!!!!!!!!!
ليست هناك تعليقات:
إرسال تعليق