مختار عيسى
مش ممكن نلبس مزيكا
المخلوع ف سرير الملك
واحنا الهلك
أيوه يا شاعر من أبنود
وادي مغولها
بلحيه حرير
طالعين لك من جوه البير
طوابير بتسلم طوابير
آدي المماليك والترك
بيأذنوا لـ الفجر الكاذب
واحنا وقوف على باب القبر
نشكي الصبر
داس على ديل الحلم وخان
وتركنا من غير عنوان
سابنا نتوه من درب لدرب
احنا ولاد الكلب الشعب
زي ماقلت علينا زمان
الصبح مكتف مجاديفه
والليل يتجوّل على كيفه
والحلم أسير القضبان
القاتل مبسوط وطليق
والمقاتيل ساكنين الضيق
والتلافيز كلها تلافيق
والكدب في وش الجرنان
والمخاليق جنب الصناديق
مش لاقيين للثوره طريق
والعدل في إيد السجان
المخلوع مرفوع الراس
والحراس شاربين م الكاس
واتبعتر فينا الإنسان
من طنطا لسينا لحلوان
المخلوع نايم مبسوط
والسايب قال للمربوط
المولود نازل مسخوط
بيغني لسيدنا الزنانيري
ويقول للشعب المتكوم
في الخيمه النايمة فـ «تحريري»
أنا هافضل لابد في سريري
آدي عام بيمر على القومهْ
ونا لسه راجع لك بحكومه
مختومه بختمي وتوقيعي
أنا لسه في الحكم طبيعي
وانت المتعوس المخدوع
بتولّع في الصبح شموع
وتنادي الطرش بشعاراتك
وبترطن لي بألف لسانْ
ان كنت مصدق أحلامك
أو كنت مفسّر معانيها
أنا وحدي صاحب التفاسيرْ
وباسمي مضيت في «التحريرْ»
اذا كانوا طلبوا التغييرْ
رح أغير جلد التعبانْ
ماتقولش يناير أو مارس
أنا لسه المحروس والحارس
والحُكم وأحكامه مدارسْ
أنا ظابط ظبّطت أموري
أنا هابط لكن دستوري
وباقولك ياللي بتتجمع
صناديقي لسه بتتشمع
وف ساعة الصفر هنتجمع
وساعتها هتشرب من تاني
شعاراتي المكتوبة أغاني
وتلاقي يناير متحيّر
إيه بس اتعدّل واتغيّر
غير حلم فقايري وقصيّر
وبرامج (توك شوز) صنعتنا
علشان ما شبابك يا مواطن
يلحق له في الحزن مساكن
نرجع لكْ نحكُم من تاني
- ياولاد الكامب يا تجّاره
الصبح اتغسّل من عاره
إذا كنتم حملة أسراره
» وطراه» بتطبّق أفكاره
فـ «يناير» جاي بزوّاره
وهيطلق ع الضلمه نهاره
اللعبة انكشفت ياصحابه
ما هو لما انفلتت أعصابه
قام طلّع من تاني كلابه
والنهش العربي المتواطئ
وقرار الدولي المتباطئ
مش ممكن ع الحلم الصادق
من تاني هنرجع لفخامته
وبشيبته هيرجع يتعايق
وف بكره هتحمر بيجامته
ونعلّق للغدر مشانق
نتخانق أو تبقى مصالحهْ
نتصندق أو نبقى مظاهرهْ
القصه قصادنا أكيد واضحه
في الخندق يافلول أمريكا
ياعبيد الياهو يافابريكا
يادعاة الفكر المتسرطنْ
مش ممكن نلبس مزيكا
ولاشغل فلولك وفلوله
وخزين أيام «المتوطن «
الشعب خلاص عارف قوله
وبحلمه اتمسّك واتمكنْ:
» المخلوع في سرير الذل
والمخاديع تحاويط العار
بكره الفجر الحيّ يطل
يطلع لينا نور على نار
بكره الدار مفروشه نهار
بكره ملان زغاريد وأغاني
وانت المتعوس المستأسد
تبقى خروف أو تبقى جاموس
دبحك يوم العيد الأسعد
قصدي جلالة غطرس بيه
يعني فخامتك يا المنحوس
بس خساره ماحدش عاوز
ريحة لحمك تملا الحاره
خلي حراستك جنب الجته
تلحق حته من المتخبي
تخطف تنهب تجري..تعبّي
وحياة ربي
وابقى افهمها
عمر مايوم واحد يظلمها
الا وراح في البير الواطي
تطلع م المحكمه مظلوم
أو تطلع مقبوض محكوم
بكره العدل الأقوى يقوم
المخلوع في سرير الحق
ولا ممكن أيوه ولا لأ
ولاحارس ترشيه بيخون
ولا فارس مغشوش مخزون
في كتايب ماركة صهيون
تعرف إنه رب الكون
هوه العدل وأمره يكون
سبحان الوهاّب العاطي
ليست هناك تعليقات:
إرسال تعليق