إلى أسيادنا
الأونطجية
إلى أسيادنا
الأونطجية
بتوع التأسيسية
المنافقين الكلامنجية
...
في الأولة كانوا
أفندية
والتانية عساكر جندية
والتالتة شلة حرامية
ودلوقتي إخوانجية
ليبرالية .. إشتراكية
شيوعية .. مهلباتية
ثورية .. إخوانية
على كل لون يا بطسطا
مكان ما ترسى يا أسطى
تلاقيهم آلاتيه
...
يعزفوا على كل
الأوتار
يوم تلاقيهم ثوار
أحرار
ويوم أنجاس أشرار
هتيفه لكل آوان
عُباد .. كُهان
مداس السلطان
وراح السلطان
وجم الإخوان
نفس الحكاية
هي .. هي
...
وعشان ما يكون لهم
دور
ويأخدوا نصيبهم من
التورتة
حطونا في ورطة
...
شقوا الصف
باعوا الوقف
خانوا العهد
ونسيوا الوعد
...
واتلموا على الرجعية
وعملوا قال آيه جمعية
سموها تأسيسية
لجل ما تعود من تاني
تكية
شوفت ولاد الحرامية!!!!!!
...
عملوا القعدة
في دار الندوة
مجلس شورى مهلبية
...
نصرخ ونقول:
يا أسيادنا دي مش
قانونية!!!!!
بتبيعوا ليه القضية؟!
يضحك بهلول ويقول
احنا بتوع الأيام
الجاية
...
وعادوا الترزية
يفصلوا القوانين
لبتوع الدين
ونسييوا حكاية
المدنية
...
وجنبهم في الميدان
صوت شهيد غضبان
بيلعن كل اللي خان
ويهتف بأعلى صوت
عيش .. حرية .. عدالة
اجتماعية
...
يسمعوه كل الأحرار
يصحي نار الثوار
فاكرين ..
الثوار؟!!!!!!!!
دول أصحاب الدار
راجعين بالملايين
يهزوا الميادين
ويوصلوا اللي انقطع
ويكملوا المشوار
...
وإوعاكم تنسوا يا
أسيادنا
يوم خمسة وعشرين
راجعين .. راجعين
محمود جبر
محمود جبر
